ಅವನಿತಲಂ ಪುನರವತೀರ್ಣಾ ಸ್ಯಾತ್

ಅವನಿತಲಂ ಪುನರವತೀರ್ಣಾ ಸ್ಯಾತ್ ಸಂಸ್ಕೃತಗಂಗಾಧಾರಾ । ಧೀರಭಗೀರಥವಂಶೋಽಸ್ಮಾಕಂ ವಯಂ ತು ಕೃತನಿರ್ಧಾರಾಃ ॥

ನಿಪತತು ಪಂಡಿತಹರಶಿರಸಿ ಪ್ರವಹತು ನಿತ್ಯಮಿದಂ ವಚಸಿ ಪ್ರವಿಶತು ವೈಯಾಕರಣಮುಖಂ ಪುನರಪಿ ವಹತಾಜ್ಜನಮನಸಿ ಪುತ್ರಸಹಸ್ರಂ ಸಮುದ್ಧೃತಂ ಸ್ಯಾತ್ ಯಾಂತು ಚ ಜನ್ಮವಿಕಾರಾಃ ॥ 1 ॥

ಗ್ರಾಮಂ ಗ್ರಾಮಂ ಗಚ್ಛಾಮ ಸಂಸ್ಕೃತಶಿಕ್ಷಾಂ ಯಚ್ಛಾಮ ಸರ್ವೇಷಾಮಪಿ ತೃಪ್ತಿಹಿತಾರ್ಥಂ ಸ್ವಕ್ಲೇಶಂ ನ ಹಿ ಗಣಯೇಮ ಕೃತೇ ಪ್ರಯತ್ನೇ ಕಿಂ ನ ಲಭೇತ ಏವಂ ಸಂತಿ ವಿಚಾರಾಃ ॥ 2 ॥

ಯಾ ಮಾತಾ ಸಂಸ್ಕೃತಿಮೂಲಾ ಯಸ್ಯಾ ವ್ಯಾಪ್ತಿಸ್ಸುವಿಶಾಲಾ ವಾಙ್ಮಯರೂಪಾ ಸಾ ಭವತು ಲಸತು ಚಿರಂ ಸಾ ವಾಙ್ಮಾಲಾ ಸುರವಾಣೀಂ ಜನವಾಣೀಂ ಕರ್ತುಂ ಯತಾಮಹೇ ಕೃತಿಶೂರಾಃ ॥ 3 ॥

ರಚನ: ಡಾ. ನಾರಾಯಣಭಟ್ಟಃ