ಶ್ರೀ ಶಂಕರಾಚಾರ್ಯ ವರ್ಯಂ

॥ ಶ್ರೀಶಂಕರಾಚಾರ್ಯಸ್ತವಃ ॥

ಶ್ರೀಶಂಕರಾಚಾರ್ಯವರ್ಯಂ ಸರ್ವಲೋಕೈಕವಂದ್ಯಂ ಭಜೇ ದೇಶಿಕೇಂದ್ರಂ

ಧರ್ಮಪ್ರಚಾರೇಽತಿದಕ್ಷಂ ಯೋಗಿಗೋವಿಂದಪಾದಾಪ್ತಸನ್ಯಾಸದೀಕ್ಷಮ್ । ದುರ್ವಾದಿಗರ್ವಾಪನೋದಂ ಪದ್ಮಪಾದಾದಿಶಿಷ್ಯಾಲಿಸಂಸೇವ್ಯಪಾದಮ್ ॥1॥ (ಶ್ರೀಶಂಕರಾಚಾರ್ಯವರ್ಯಂ)

ಶಂಕಾದ್ರಿದಂಭೋಲಿಲೀಲಂ ಕಿಂಕರಾಶೇಷಶಿಷ್ಯಾಲಿ ಸಂತ್ರಾಣಶೀಲಮ್ । ಬಾಲಾರ್ಕನೀಕಾಶಚೇಲಂ ಬೋಧಿತಾಶೇಷವೇದಾಂತ ಗೂಢಾರ್ಥಜಾಲಮ್ ॥2॥ (ಶ್ರೀಶಂಕರಾಚಾರ್ಯವರ್ಯಂ)

ರುದ್ರಾಕ್ಷಮಾಲಾವಿಭೂಷಂ ಚಂದ್ರಮೌಲೀಶ್ವರಾರಾಧನಾವಾಪ್ತತೋಷಮ್ । ವಿದ್ರಾವಿತಾಶೇಷದೋಷಂ ಭದ್ರಪೂಗಪ್ರದಂ ಭಕ್ತಲೋಕಸ್ಯ ನಿತ್ಯಮ್ ॥3॥ (ಶ್ರೀಶಂಕರಾಚಾರ್ಯವರ್ಯಂ)

ಪಾಪಾಟವೀಚಿತ್ರಭಾನುಂ ಜ್ಞಾನದೀಪೇನ ಹಾರ್ದಂ ತಮೋ ವಾರಯಂತಮ್ । ದ್ವೈಪಾಯನಪ್ರೀತಿಭಾಜಂ ಸರ್ವತಾಪಾಪಹಾಮೋಘಬೋಧಪ್ರದಂ ತಮ್ ॥4॥ (ಶ್ರೀಶಂಕರಾಚಾರ್ಯವರ್ಯಂ)

ರಾಜಾಧಿರಾಜಾಭಿಪೂಜ್ಯಂ ರಮ್ಯಶೃಂಗಾದ್ರಿವಾಸೈಕಲೋಲಂ ಯತೀಡ್ಯಮ್ । ರಾಕೇಂದುಸಂಕಾಶವಕ್ತ್ರಂ ರತ್ನಗರ್ಭೇಭವಕ್ತ್ರಾಂಘ್ರಿಪೂಜಾನುರಕ್ತಮ್ ॥5॥ (ಶ್ರೀಶಂಕರಾಚಾರ್ಯವರ್ಯಂ)

ಶ್ರೀಭಾರತೀತೀರ್ಥಗೀತಂ ಶಂಕರಾರ್ಯಸ್ತವಂ ಯಃ ಪಠೇದ್ಭಕ್ತಿಯುಕ್ತಃ । ಸೋಽವಾಪ್ನುಯಾತ್ಸರ್ವಮಿಷ್ಟಂ ಶಂಕರಾಚಾರ್ಯವರ್ಯಪ್ರಸಾದೇನ ತೂರ್ಣಮ್ ॥6॥ (ಶ್ರೀಶಂಕರಾಚಾರ್ಯವರ್ಯಂ)