ಶರಭೇಶಾಷ್ಟಕಂ

ಶ್ರೀ ಶಿವ ಉವಾಚ ಶೃಣು ದೇವಿ ಮಹಾಗುಹ್ಯಂ ಪರಂ ಪುಣ್ಯವಿವರ್ಧನಂ . ಶರಭೇಶಾಷ್ಟಕಂ ಮಂತ್ರಂ ವಕ್ಷ್ಯಾಮಿ ತವ ತತ್ತ್ವತಃ ॥

ಋಷಿನ್ಯಾಸಾದಿಕಂ ಯತ್ತತ್ಸರ್ವಪೂರ್ವವದಾಚರೇತ್ . ಧ್ಯಾನಭೇದಂ ವಿಶೇಷೇಣ ವಕ್ಷ್ಯಾಮ್ಯಹಮತಃ ಶಿವೇ ॥

ಧ್ಯಾನಂ ಜ್ವಲನಕುಟಿಲಕೇಶಂ ಸೂರ್ಯಚಂದ್ರಾಗ್ನಿನೇತ್ರಂ ನಿಶಿತತರನಖಾಗ್ರೋದ್ಧೂತಹೇಮಾಭದೇಹಮ್ । ಶರಭಮಥ ಮುನೀಂದ್ರೈಃ ಸೇವ್ಯಮಾನಂ ಸಿತಾಂಗಂ ಪ್ರಣತಭಯವಿನಾಶಂ ಭಾವಯೇತ್ಪಕ್ಷಿರಾಜಮ್ ॥

ಅಥ ಸ್ತೋತ್ರಂ ದೇವಾದಿದೇವಾಯ ಜಗನ್ಮಯಾಯ ಶಿವಾಯ ನಾಲೀಕನಿಭಾನನಾಯ । ಶರ್ವಾಯ ಭೀಮಾಯ ಶರಾಧಿಪಾಯ ನಮೋಽಸ್ತು ತುಭ್ಯಂ ಶರಭೇಶ್ವರಾಯ ॥ 1 ॥

ಹರಾಯ ಭೀಮಾಯ ಹರಿಪ್ರಿಯಾಯ ಭವಾಯ ಶಾಂತಾಯ ಪರಾತ್ಪರಾಯ । ಮೃಡಾಯ ರುದ್ರಾಯ ವಿಲೋಚನಾಯ ನಮೋಽಸ್ತು ತುಭ್ಯಂ ಶರಭೇಶ್ವರಾಯ ॥ 2 ॥

ಶೀತಾಂಶುಚೂಡಾಯ ದಿಗಂಬರಾಯ ಸೃಷ್ಟಿಸ್ಥಿತಿಧ್ವಂಸನಕಾರಣಾಯ । ಜಟಾಕಲಾಪಾಯ ಜಿತೇಂದ್ರಿಯಾಯ ನಮೋಽಸ್ತು ತುಭ್ಯಂ ಶರಭೇಶ್ವರಾಯ ॥ 3 ॥

ಕಲಂಕಕಂಠಾಯ ಭವಾಂತಕಾಯ ಕಪಾಲಶೂಲಾತ್ತಕರಾಂಬುಜಾಯ । ಭುಜಂಗಭೂಷಾಯ ಪುರಾಂತಕಾಯ ನಮೋಽಸ್ತು ತುಭ್ಯಂ ಶರಭೇಶ್ವರಾಯ ॥ 4 ॥

ಶಮಾದಿಷಟ್ಕಾಯ ಯಮಾಂತಕಾಯ ಯಮಾದಿಯೋಗಾಷ್ಟಕಸಿದ್ಧಿದಾಯ । ಉಮಾಧಿನಾಥಾಯ ಪುರಾತನಾಯ ನಮೋಽಸ್ತು ತುಭ್ಯಂ ಶರಭೇಶ್ವರಾಯ ॥ 5 ॥

ಘೃಣಾದಿಪಾಶಾಷ್ಟಕವರ್ಜಿತಾಯ ಖಿಲೀಕೃತಾಸ್ಮತ್ಪಥಿ ಪೂರ್ವಗಾಯ । ಗುಣಾದಿಹೀನಾಯ ಗುಣತ್ರಯಾಯ ನಮೋಽಸ್ತು ತುಭ್ಯಂ ಶರಭೇಶ್ವರಾಯ ॥ 6 ॥

ಕಾಲಾಯ ವೇದಾಮೃತಕಂದಲಾಯ ಕಲ್ಯಾಣಕೌತೂಹಲಕಾರಣಾಯ । ಸ್ಥೂಲಾಯ ಸೂಕ್ಷ್ಮಾಯ ಸ್ವರೂಪಗಾಯ ನಮೋಽಸ್ತು ತುಭ್ಯಂ ಶರಭೇಶ್ವರಾಯ ॥ 7 ॥

ಪಂಚಾನನಾಯಾನಿಲಭಾಸ್ಕರಾಯ ಪಂಚಾಶದರ್ಣಾದ್ಯಪರಾಕ್ಷಯಾಯ । ಪಂಚಾಕ್ಷರೇಶಾಯ ಜಗದ್ಧಿತಾಯ ನಮೋಽಸ್ತು ತುಭ್ಯಂ ಶರಭೇಶ್ವರಾಯ ॥ 8 ॥

ಇತಿ ಶ್ರೀ ಶರಭೇಶಾಷ್ಟಕಮ್ ॥