ಶ್ರೀ ಕೃಷ್ಣ ಸಹಸ್ರ ನಾಮ ಸ್ತೋತ್ರಂ

ಓಂ ಅಸ್ಯ ಶ್ರೀಕೃಷ್ಣಸಹಸ್ರನಾಮಸ್ತೋತ್ರಮಂತ್ರಸ್ಯ ಪರಾಶರ ಋಷಿಃ, ಅನುಷ್ಟುಪ್ ಛಂದಃ, ಶ್ರೀಕೃಷ್ಣಃ ಪರಮಾತ್ಮಾ ದೇವತಾ, ಶ್ರೀಕೃಷ್ಣೇತಿ ಬೀಜಂ, ಶ್ರೀವಲ್ಲಭೇತಿ ಶಕ್ತಿಃ, ಶಾರಂಗೀತಿ ಕೀಲಕಂ, ಶ್ರೀಕೃಷ್ಣಪ್ರೀತ್ಯರ್ಥೇ ಜಪೇ ವಿನಿಯೋಗಃ ॥

ನ್ಯಾಸಃ ಪರಾಶರಾಯ ಋಷಯೇ ನಮಃ ಇತಿ ಶಿರಸಿ, ಅನುಷ್ಟುಪ್ ಛಂದಸೇ ನಮಃ ಇತಿ ಮುಖೇ, ಗೋಪಾಲಕೃಷ್ಣದೇವತಾಯೈ ನಮಃ ಇತಿ ಹೃದಯೇ, ಶ್ರೀಕೃಷ್ಣಾಯ ಬೀಜಾಯ ನಮಃ ಇತಿ ಗುಹ್ಯೇ, ಶ್ರೀವಲ್ಲಭಾಯ ಶಕ್ತ್ಯೈ ನಮಃ ಇತಿ ಪಾದಯೋಃ, ಶಾರ್ಙ್ಗಧರಾಯ ಕೀಲಕಾಯ ನಮಃ ಇತಿ ಸರ್ವಾಂಗೇ ॥

ಕರನ್ಯಾಸಃ ಶ್ರೀಕೃಷ್ಣ ಇತ್ಯಾರಭ್ಯ ಶೂರವಂಶೈಕಧೀರಿತ್ಯಂತಾನಿ ಅಂಗುಷ್ಠಾಭ್ಯಾಂ ನಮಃ । ಶೌರಿರಿತ್ಯಾರಭ್ಯ ಸ್ವಭಾಸೋದ್ಭಾಸಿತವ್ರಜ ಇತ್ಯಂತಾನಿ ತರ್ಜನೀಭ್ಯಾಂ ನಮಃ । ಕೃತಾತ್ಮವಿದ್ಯಾವಿನ್ಯಾಸ ಇತ್ಯಾರಭ್ಯ ಪ್ರಸ್ಥಾನಶಕಟಾರೂಢ ಇತಿ ಮಧ್ಯಮಾಭ್ಯಾಂ ನಮಃ, ಬೃಂದಾವನಕೃತಾಲಯ ಇತ್ಯಾರಭ್ಯ ಮಧುರಾಜನವೀಕ್ಷಿತ ಇತ್ಯನಾಮಿಕಾಭ್ಯಾಂ ನಮಃ, ರಜಕಪ್ರತಿಘಾತಕ ಇತ್ಯಾರಭ್ಯ ದ್ವಾರಕಾಪುರಕಲ್ಪನ ಇತಿ ಕನಿಷ್ಠಿಕಾಭ್ಯಾಂ ನಮಃ ದ್ವಾರಕಾನಿಲಯ ಇತ್ಯಾರಭ್ಯ ಪರಾಶರ ಇತಿ ಕರತಲಕರಪೃಷ್ಠಾಭ್ಯಾಂ ನಮಃ, ಏವಂ ಹೃದಯಾದಿನ್ಯಾಸಃ ॥

ಧ್ಯಾನಂ ಕೇಷಾಂಚಿತ್ಪ್ರೇಮಪುಂಸಾಂ ವಿಗಲಿತಮನಸಾಂ ಬಾಲಲೀಲಾವಿಲಾಸಂ ಕೇಷಾಂ ಗೋಪಾಲಲೀಲಾಂಕಿತರಸಿಕತನುರ್ವೇಣುವಾದ್ಯೇನ ದೇವಮ್ । ಕೇಷಾಂ ವಾಮಾಸಮಾಜೇ ಜನಿತಮನಸಿಜೋ ದೈತ್ಯದರ್ಪಾಪಹೈವಂ ಜ್ಞಾತ್ವಾ ಭಿನ್ನಾಭಿಲಾಷಂ ಸ ಜಯತಿ ಜಗತಾಮೀಶ್ವರಸ್ತಾದೃಶೋಽಭೂತ್ ॥ 1 ॥

ಕ್ಷೀರಾಬ್ಧೌ ಕೃತಸಂಸ್ತವಸ್ಸುರಗಣೈರ್ಬ್ರಹ್ಮಾದಿಭಿಃ ಪಂಡಿತೈಃ ಪ್ರೋದ್ಭೂತೋ ವಸುದೇವಸದ್ಮನಿ ಮುದಾ ಚಿಕ್ರೀಡ ಯೋ ಗೋಕುಲೇ । ಕಂಸಧ್ವಂಸಕೃತೇ ಜಗಾಮ ಮಧುರಾಂ ಸಾರಾಮಸದ್ವಾರಕಾಂ ಗೋಪಾಲೋಽಖಿಲಗೋಪಿಕಾಜನಸಖಃ ಪಾಯಾದಪಾಯಾತ್ ಸ ನಃ ॥ 2 ॥

ಫುಲ್ಲೇಂದೀವರಕಾಂತಿಮಿಂದುವದನಂ ಬರ್ಹಾವತಂಸಪ್ರಿಯಂ ಶ್ರೀವತ್ಸಾಂಕಮುದಾರಕೌಸ್ತುಭಧರಂ ಪೀತಾಂಬರಂ ಸುಂದರಮ್ । ಗೋಪೀನಾಂ ನಯನೋತ್ಪಲಾರ್ಚಿತತನುಂ ಗೋಗೋಪಸಂಘಾವೃತಂ ಗೋವಿಂದಂ ಕಲವೇಣುವಾದನರತಂ ದಿವ್ಯಾಂಗಭೂಷಂ ಭಜೇ ॥ 3 ॥

ಓಮ್ । ಕೃಷ್ಣಃ ಶ್ರೀವಲ್ಲಭಃ ಶಾರಂಗೀ ವಿಷ್ವಕ್ಸೇನಃ ಸ್ವಸಿದ್ಧಿದಃ । ಕ್ಷೀರೋದಧಾಮಾ ವ್ಯೂಹೇಶಃ ಶೇಷಶಾಯೀ ಜಗನ್ಮಯಃ ॥ 1 ॥

ಭಕ್ತಿಗಮ್ಯಸ್ತ್ರಯೀಮೂರ್ತಿರ್ಭಾರಾರ್ತವಸುಧಾಸ್ತುತಃ । ದೇವದೇವೋ ದಯಾಸಿಂಧುರ್ದೇವದೇವಶಿಖಾಮಣಿಃ ॥ 2 ॥

ಸುಖಭಾವಸ್ಸುಖಾಧಾರೋ ಮುಕುಂದೋ ಮುದಿತಾಶಯಃ । ಅವಿಕ್ರಿಯಃ ಕ್ರಿಯಾಮೂರ್ತಿರಧ್ಯಾತ್ಮಸ್ವಸ್ವರೂಪವಾನ್ ॥ 3 ॥

ಶಿಷ್ಟಾಭಿಲಕ್ಷ್ಯೋ ಭೂತಾತ್ಮಾ ಧರ್ಮತ್ರಾಣಾರ್ಥಚೇಷ್ಟಿತಃ । ಅಂತರ್ಯಾಮೀ ಕಲಾರೂಪಃ ಕಾಲಾವಯವಸಾಕ್ಷಿಕಃ ॥ 4 ॥

ವಸುಧಾಯಾಸಹರಣೋ ನಾರದಪ್ರೇರಣೋನ್ಮುಖಃ । ಪ್ರಭೂಷ್ಣುರ್ನಾರದೋದ್ಗೀತೋ ಲೋಕರಕ್ಷಾಪರಾಯಣಃ ॥ 5 ॥

ರೌಹಿಣೇಯಕೃತಾನಂದೋ ಯೋಗಜ್ಞಾನನಿಯೋಜಕಃ । ಮಹಾಗುಹಾಂತರ್ನಿಕ್ಷಿಪ್ತಃ ಪುರಾಣವಪುರಾತ್ಮವಾನ್ ॥ 6 ॥

ಶೂರವಂಶೈಕಧೀಶ್ಶೌರಿಃ ಕಂಸಶಂಕಾವಿಷಾದಕೃತ್ । ವಸುದೇವೋಲ್ಲಸಚ್ಛಕ್ತಿರ್ದೇವಕ್ಯಷ್ಟಮಗರ್ಭಗಃ ॥ 7 ॥

ವಸುದೇವಸುತಃ ಶ್ರೀಮಾಂದೇವಕೀನಂದನೋ ಹರಿಃ । ಆಶ್ಚರ್ಯಬಾಲಃ ಶ್ರೀವತ್ಸಲಕ್ಷ್ಮವಕ್ಷಾಶ್ಚತುರ್ಭುಜಃ ॥ 8 ॥

ಸ್ವಭಾವೋತ್ಕೃಷ್ಟಸದ್ಭಾವಃ ಕೃಷ್ಣಾಷ್ಟಮ್ಯಂತಸಂಭವಃ । ಪ್ರಾಜಾಪತ್ಯರ್ಕ್ಷಸಂಭೂತೋ ನಿಶೀಥಸಮಯೋದಿತಃ ॥ 9 ॥

ಶಂಖಚಕ್ರಗದಾಪದ್ಮಪಾಣಿಃ ಪದ್ಮನಿಭೇಕ್ಷಣಃ । ಕಿರೀಟೀ ಕೌಸ್ತುಭೋರಸ್ಕಃ ಸ್ಫುರನ್ಮಕರಕುಂಡಲಃ ॥ 10 ॥

ಪೀತವಾಸಾ ಘನಶ್ಯಾಮಃ ಕುಂಚಿತಾಂಚಿತಕುಂತಲಃ । ಸುವ್ಯಕ್ತವ್ಯಕ್ತಾಭರಣಃ ಸೂತಿಕಾಗೃಹಭೂಷಣಃ ॥ 11 ॥

ಕಾರಾಗಾರಾಂಧಕಾರಘ್ನಃ ಪಿತೃಪ್ರಾಗ್ಜನ್ಮಸೂಚಕಃ । ವಸುದೇವಸ್ತುತಃ ಸ್ತೋತ್ರಂ ತಾಪತ್ರಯನಿವಾರಣಃ ॥ 12 ॥

ನಿರವದ್ಯಃ ಕ್ರಿಯಾಮೂರ್ತಿರ್ನ್ಯಾಯವಾಕ್ಯನಿಯೋಜಕಃ । ಅದೃಷ್ಟಚೇಷ್ಟಃ ಕೂಟಸ್ಥೋ ಧೃತಲೌಕಿಕವಿಗ್ರಹಃ ॥ 13 ॥

ಮಹರ್ಷಿಮಾನಸೋಲ್ಲಾಸೋ ಮಹೀಮಂಗಲದಾಯಕಃ । ಸಂತೋಷಿತಸುರವ್ರಾತಃ ಸಾಧುಚಿತ್ತಪ್ರಸಾದಕಃ ॥ 14 ॥

ಜನಕೋಪಾಯನಿರ್ದೇಷ್ಟಾ ದೇವಕೀನಯನೋತ್ಸವಃ । ಪಿತೃಪಾಣಿಪರಿಷ್ಕಾರೋ ಮೋಹಿತಾಗಾರರಕ್ಷಕಃ ॥ 15 ॥

ಸ್ವಶಕ್ತ್ಯುದ್ಧಾಟಿತಾಶೇಷಕಪಾಟಃ ಪಿತೃವಾಹಕಃ । ಶೇಷೋರಗಫಣಾಚ್ಛತ್ರಶ್ಶೇಷೋಕ್ತಾಖ್ಯಾಸಹಸ್ರಕಃ ॥ 16 ॥

ಯಮುನಾಪೂರವಿಧ್ವಂಸೀ ಸ್ವಭಾಸೋದ್ಭಾಸಿತವ್ರಜಃ । ಕೃತಾತ್ಮವಿದ್ಯಾವಿನ್ಯಾಸೋ ಯೋಗಮಾಯಾಗ್ರಸಂಭವಃ ॥ 17 ॥

ದುರ್ಗಾನಿವೇದಿತೋದ್ಭಾವೋ ಯಶೋದಾತಲ್ಪಶಾಯಕಃ । ನಂದಗೋಪೋತ್ಸವಸ್ಫೂರ್ತಿರ್ವ್ರಜಾನಂದಕರೋದಯಃ ॥ 18 ॥

ಸುಜಾತಜಾತಕರ್ಮ ಶ್ರೀರ್ಗೋಪೀಭದ್ರೋಕ್ತಿನಿರ್ವೃತಃ । ಅಲೀಕನಿದ್ರೋಪಗಮಃ ಪೂತನಾಸ್ತನಪೀಡನಃ ॥ 19 ॥

ಸ್ತನ್ಯಾತ್ತಪೂತನಾಪ್ರಾಣಃ ಪೂತನಾಕ್ರೋಶಕಾರಕಃ । ವಿನ್ಯಸ್ತರಕ್ಷಾಗೋಧೂಲಿರ್ಯಶೋದಾಕರಲಾಲಿತಃ ॥ 20 ॥

ನಂದಾಘ್ರಾತಶಿರೋಮಧ್ಯಃ ಪೂತನಾಸುಗತಿಪ್ರದಃ । ಬಾಲಃ ಪರ್ಯಂಕನಿದ್ರಾಲುರ್ಮುಖಾರ್ಪಿತಪದಾಂಗುಲಿಃ ॥ 21 ॥

ಅಂಜನಸ್ನಿಗ್ಧನಯನಃ ಪರ್ಯಾಯಾಂಕುರಿತಸ್ಮಿತಃ । ಲೀಲಾಕ್ಷಸ್ತರಲಾಲೋಕಶ್ಶಕಟಾಸುರಭಂಜನಃ ॥ 22 ॥

ದ್ವಿಜೋದಿತಸ್ವಸ್ತ್ಯಯನೋ ಮಂತ್ರಪೂತಜಲಾಪ್ಲುತಃ । ಯಶೋದೋತ್ಸಂಗಪರ್ಯಂಕೋ ಯಶೋದಾಮುಖವೀಕ್ಷಕಃ ॥ 23 ॥

ಯಶೋದಾಸ್ತನ್ಯಮುದಿತಸ್ತೃಣಾವರ್ತಾದಿದುಸ್ಸಹಃ । ತೃಣಾವರ್ತಾಸುರಧ್ವಂಸೀ ಮಾತೃವಿಸ್ಮಯಕಾರಕಃ ॥ 24 ॥

ಪ್ರಶಸ್ತನಾಮಕರಣೋ ಜಾನುಚಂಕ್ರಮಣೋತ್ಸುಕಃ । ವ್ಯಾಲಂಬಿಚೂಲಿಕಾರತ್ನೋ ಘೋಷಗೋಪಪ್ರಹರ್ಷಣಃ ॥ 25 ॥

ಸ್ವಮುಖಪ್ರತಿಬಿಂಬಾರ್ಥೀ ಗ್ರೀವಾವ್ಯಾಘ್ರನಖೋಜ್ಜ್ವಲಃ । ಪಂಕಾನುಲೇಪರುಚಿರೋ ಮಾಂಸಲೋರುಕಟೀತಟಃ ॥ 26 ॥

ಘೃಷ್ಟಜಾನುಕರದ್ವಂದ್ವಃ ಪ್ರತಿಬಿಂಬಾನುಕಾರಕೃತ್ । ಅವ್ಯಕ್ತವರ್ಣವಾಗ್ವೃತ್ತಿಃ ಸ್ಮಿತಲಕ್ಷ್ಯರದೋದ್ಗಮಃ ॥ 27 ॥

ಧಾತ್ರೀಕರಸಮಾಲಂಬೀ ಪ್ರಸ್ಖಲಚ್ಚಿತ್ರಚಂಕ್ರಮಃ । ಅನುರೂಪವಯಸ್ಯಾಢ್ಯಶ್ಚಾರುಕೌಮಾರಚಾಪಲಃ ॥ 28 ॥

ವತ್ಸಪುಚ್ಛಸಮಾಕೃಷ್ಟೋ ವತ್ಸಪುಚ್ಛವಿಕರ್ಷಣಃ । ವಿಸ್ಮಾರಿತಾನ್ಯವ್ಯಾಪಾರೋ ಗೋಪಗೋಪೀಮುದಾವಹಃ ॥ 29 ॥

ಅಕಾಲವತ್ಸನಿರ್ಮೋಕ್ತಾ ವ್ರಜವ್ಯಾಕ್ರೋಶಸುಸ್ಮಿತಃ । ನವನೀತಮಹಾಚೋರೋ ದಾರಕಾಹಾರದಾಯಕಃ ॥ 30 ॥

ಪೀಠೋಲೂಖಲಸೋಪಾನಃ ಕ್ಷೀರಭಾಂಡವಿಭೇದನಃ । ಶಿಕ್ಯಭಾಂಡಸಮಾಕರ್ಷೀ ಧ್ವಾಂತಾಗಾರಪ್ರವೇಶಕೃತ್ ॥ 31 ॥

ಭೂಷಾರತ್ನಪ್ರಕಾಶಾಢ್ಯೋ ಗೋಪ್ಯುಪಾಲಂಭಭರ್ತ್ಸಿತಃ । ಪರಾಗಧೂಸರಾಕಾರೋ ಮೃದ್ಭಕ್ಷಣಕೃತೇಕ್ಷಣಃ ॥ 32 ॥

ಬಾಲೋಕ್ತಮೃತ್ಕಥಾರಂಭೋ ಮಿತ್ರಾಂತರ್ಗೂಢವಿಗ್ರಹಃ । ಕೃತಸಂತ್ರಾಸಲೋಲಾಕ್ಷೋ ಜನನೀಪ್ರತ್ಯಯಾವಹಃ ॥ 33॥

ಮಾತೃದೃಶ್ಯಾತ್ತವದನೋ ವಕ್ತ್ರಲಕ್ಷ್ಯಚರಾಚರಃ । ಯಶೋದಾಲಾಲಿತಸ್ವಾತ್ಮಾ ಸ್ವಯಂ ಸ್ವಾಚ್ಛಂದ್ಯಮೋಹನಃ ॥ 34 ॥

ಸವಿತ್ರೀಸ್ನೇಹಸಂಶ್ಲಿಷ್ಟಃ ಸವಿತ್ರೀಸ್ತನಲೋಲುಪಃ । ನವನೀತಾರ್ಥನಾಪ್ರಹ್ವೋ ನವನೀತಮಹಾಶನಃ ॥ 35 ॥

ಮೃಷಾಕೋಪಪ್ರಕಂಪೋಷ್ಠೋ ಗೋಷ್ಠಾಂಗಣವಿಲೋಕನಃ । ದಧಿಮಂಥಘಟೀಭೇತ್ತಾ ಕಿಂಕಿಣೀಕ್ವಾಣಸೂಚಿತಃ ॥ 36 ॥

ಹೈಯಂಗವೀನರಸಿಕೋ ಮೃಷಾಶ್ರುಶ್ಚೌರ್ಯಶಂಕಿತಃ । ಜನನೀಶ್ರಮವಿಜ್ಞಾತಾ ದಾಮಬಂಧನಿಯಂತ್ರಿತಃ ॥ 37 ॥

ದಾಮಾಕಲ್ಪಶ್ಚಲಾಪಾಂಗೋ ಗಾಢೋಲೂಖಲಬಂಧನಃ । ಆಕೃಷ್ಟೋಲೂಖಲೋಽನಂತಃ ಕುಬೇರಸುತಶಾಪವಿತ್ ॥ । 38 ॥

ನಾರದೋಕ್ತಿಪರಾಮರ್ಶೀ ಯಮಲಾರ್ಜುನಭಂಜನಃ । ಧನದಾತ್ಮಜಸಂಘುಷ್ಟೋ ನಂದಮೋಚಿತಬಂಧನಃ ॥ 39 ॥

ಬಾಲಕೋದ್ಗೀತನಿರತೋ ಬಾಹುಕ್ಷೇಪೋದಿತಪ್ರಿಯಃ । ಆತ್ಮಜ್ಞೋ ಮಿತ್ರವಶಗೋ ಗೋಪೀಗೀತಗುಣೋದಯಃ ॥ 40 ॥

ಪ್ರಸ್ಥಾನಶಕಟಾರೂಢೋ ಬೃಂದಾವನಕೃತಾಲಯಃ । ಗೋವತ್ಸಪಾಲನೈಕಾಗ್ರೋ ನಾನಾಕ್ರೀಡಾಪರಿಚ್ಛದಃ ॥ 41 ॥

ಕ್ಷೇಪಣೀಕ್ಷೇಪಣಪ್ರೀತೋ ವೇಣುವಾದ್ಯವಿಶಾರದಃ । ವೃಷವತ್ಸಾನುಕರಣೋ ವೃಷಧ್ವಾನವಿಡಂಬನಃ ॥ 42 ॥

ನಿಯುದ್ಧಲೀಲಾಸಂಹೃಷ್ಟಃ ಕೂಜಾನುಕೃತಕೋಕಿಲಃ । ಉಪಾತ್ತಹಂಸಗಮನಸ್ಸರ್ವಜಂತುರುತಾನುಕೃತ್ ॥ 43 ॥

ಭೃಂಗಾನುಕಾರೀ ದಧ್ಯನ್ನಚೋರೋ ವತ್ಸಪುರಸ್ಸರಃ । ಬಲೀ ಬಕಾಸುರಗ್ರಾಹೀ ಬಕತಾಲುಪ್ರದಾಹಕಃ ॥ 44 ॥

ಭೀತಗೋಪಾರ್ಭಕಾಹೂತೋ ಬಕಚಂಚುವಿದಾರಣಃ । ಬಕಾಸುರಾರಿರ್ಗೋಪಾಲೋ ಬಾಲೋ ಬಾಲಾದ್ಭುತಾವಹಃ ॥ 45 ॥

ಬಲಭದ್ರಸಮಾಶ್ಲಿಷ್ಟಃ ಕೃತಕ್ರೀಡಾನಿಲಾಯನಃ । ಕ್ರೀಡಾಸೇತುನಿಧಾನಜ್ಞಃ ಪ್ಲವಂಗೋತ್ಪ್ಲವನೋಽದ್ಭುತಃ ॥ 46 ॥

ಕಂದುಕಕ್ರೀಡನೋ ಲುಪ್ತನಂದಾದಿಭವವೇದನಃ । ಸುಮನೋಽಲಂಕೃತಶಿರಾಃ ಸ್ವಾದುಸ್ನಿಗ್ಧಾನ್ನಶಿಕ್ಯಭೃತ್ ॥ 47 ॥

ಗುಂಜಾಪ್ರಾಲಂಬನಚ್ಛನ್ನಃ ಪಿಂಛೈರಲಕವೇಷಕೃತ್ । ವನ್ಯಾಶನಪ್ರಿಯಃ ಶೃಂಗರವಾಕಾರಿತವತ್ಸಕಃ ॥ 48 ॥

ಮನೋಜ್ಞಪಲ್ಲವೋತ್ತಂಸಪುಷ್ಪಸ್ವೇಚ್ಛಾತ್ತಷಟ್ಪದಃ । ಮಂಜುಶಿಂಜಿತಮಂಜೀರಚರಣಃ ಕರಕಂಕಣಃ ॥ 49 ॥

ಅನ್ಯೋನ್ಯಶಾಸನಃ ಕ್ರೀಡಾಪಟುಃ ಪರಮಕೈತವಃ । ಪ್ರತಿಧ್ವಾನಪ್ರಮುದಿತಃ ಶಾಖಾಚತುರಚಂಕ್ರಮಃ ॥ 50 ॥

ಅಘದಾನವಸಂಹರ್ತಾ ವ್ರಜವಿಘ್ನವಿನಾಶನಃ । ವ್ರಜಸಂಜೀವನಃ ಶ್ರೇಯೋನಿಧಿರ್ದಾನವಮುಕ್ತಿದಃ ॥ 51 ॥

ಕಾಲಿಂದೀಪುಲಿನಾಸೀನಸ್ಸಹಭುಕ್ತವ್ರಜಾರ್ಭಕಃ । ಕಕ್ಷಾಜಠರವಿನ್ಯಸ್ತವೇಣುರ್ವಲ್ಲವಚೇಷ್ಟಿತಃ ॥ 52 ॥

ಭುಜಸಂಧ್ಯಂತರನ್ಯಸ್ತಶೃಂಗವೇತ್ರಃ ಶುಚಿಸ್ಮಿತಃ । ವಾಮಪಾಣಿಸ್ಥದಧ್ಯನ್ನಕಬಲಃ ಕಲಭಾಷಣಃ ॥ 53 ॥

ಅಂಗುಲ್ಯಂತರವಿನ್ಯಸ್ತಫಲಃ ಪರಮಪಾವನಃ । ಅದೃಶ್ಯತರ್ಣಕಾನ್ವೇಷೀ ವಲ್ಲವಾರ್ಭಕಭೀತಿಹಾ ॥ 54 ॥

ಅದೃಷ್ಟವತ್ಸಪವ್ರಾತೋ ಬ್ರಹ್ಮವಿಜ್ಞಾತವೈಭವಃ । ಗೋವತ್ಸವತ್ಸಪಾನ್ವೇಷೀ ವಿರಾಟ್-ಪುರುಷವಿಗ್ರಹಃ ॥ 55 ॥

ಸ್ವಸಂಕಲ್ಪಾನುರೂಪಾರ್ಥೋ ವತ್ಸವತ್ಸಪರೂಪಧೃಕ್ । ಯಥಾವತ್ಸಕ್ರಿಯಾರೂಪೋ ಯಥಾಸ್ಥಾನನಿವೇಶನಃ ॥ 56 ॥

ಯಥಾವ್ರಜಾರ್ಭಕಾಕಾರೋ ಗೋಗೋಪೀಸ್ತನ್ಯಪಸ್ಸುಖೀ । ಚಿರಾದ್ವಲೋಹಿತೋ ದಾಂತೋ ಬ್ರಹ್ಮವಿಜ್ಞಾತವೈಭವಃ ॥ 57 ॥

ವಿಚಿತ್ರಶಕ್ತಿರ್ವ್ಯಾಲೀನಸೃಷ್ಟಗೋವತ್ಸವತ್ಸಪಃ । ಬ್ರಹ್ಮತ್ರಪಾಕರೋ ಧಾತೃಸ್ತುತಸ್ಸರ್ವಾರ್ಥಸಾಧಕಃ ॥ 58 ॥

ಬ್ರಹ್ಮ ಬ್ರಹ್ಮಮಯೋಽವ್ಯಕ್ತಸ್ತೇಜೋರೂಪಸ್ಸುಖಾತ್ಮಕಃ । ನಿರುಕ್ತಂ ವ್ಯಾಕೃತಿರ್ವ್ಯಕ್ತೋ ನಿರಾಲಂಬನಭಾವನಃ ॥ 59 ॥

ಪ್ರಭವಿಷ್ಣುರತಂತ್ರೀಕೋ ದೇವಪಕ್ಷಾರ್ಥರೂಪಧೃಕ್ । ಅಕಾಮಸ್ಸರ್ವವೇದಾದಿರಣೀಯಸ್ಥೂಲರೂಪವಾನ್ ॥ 60 ॥

ವ್ಯಾಪೀ ವ್ಯಾಪ್ಯಃ ಕೃಪಾಕರ್ತಾ ವಿಚಿತ್ರಾಚಾರಸಮ್ಮತಃ । ಛಂದೋಮಯಃ ಪ್ರಧಾನಾತ್ಮಾ ಮೂರ್ತಾಮೂರ್ತಿದ್ವಯಾಕೃತಿಃ ॥ 61 ॥

ಅನೇಕಮೂರ್ತಿರಕ್ರೋಧಃ ಪರಃ ಪ್ರಕೃತಿರಕ್ರಮಃ । ಸಕಲಾವರಣೋಪೇತಸ್ಸರ್ವದೇವೋ ಮಹೇಶ್ವರಃ ॥ 62 ॥

ಮಹಾಪ್ರಭಾವನಃ ಪೂರ್ವವತ್ಸವತ್ಸಪದರ್ಶಕಃ । ಕೃಷ್ಣಯಾದವಗೋಪಾಲೋ ಗೋಪಾಲೋಕನಹರ್ಷಿತಃ ॥ 63 ॥

ಸ್ಮಿತೇಕ್ಷಾಹರ್ಷಿತಬ್ರಹ್ಮಾ ಭಕ್ತವತ್ಸಲವಾಕ್ಪ್ರಿಯಃ । ಬ್ರಹ್ಮಾನಂದಾಶ್ರುಧೌತಾಂಘ್ರಿರ್ಲೀಲಾವೈಚಿತ್ರ್ಯಕೋವಿದಃ ॥ 64 ॥

ಬಲಭದ್ರೈಕಹೃದಯೋ ನಾಮಾಕಾರಿತಗೋಕುಲಃ । ಗೋಪಾಲಬಾಲಕೋ ಭವ್ಯೋ ರಜ್ಜುಯಜ್ಞೋಪವೀತವಾನ್ ॥ 65 ॥

ವೃಕ್ಷಚ್ಛಾಯಾಹತಾಶಾಂತಿರ್ಗೋಪೋತ್ಸಂಗೋಪಬರ್ಹಣಃ । ಗೋಪಸಂವಾಹಿತಪದೋ ಗೋಪವ್ಯಜನವೀಜಿತಃ ॥ 66। ಗೋಪಗಾನಸುಖೋನ್ನಿದ್ರಃ ಶ್ರೀದಾಮಾರ್ಜಿತಸೌಹೃದಃ । ಸುನಂದಸುಹೃದೇಕಾತ್ಮಾ ಸುಬಲಪ್ರಾಣರಂಜನಃ ॥ 67 ॥

ತಾಲೀವನಕೃತಕ್ರೀಡೋ ಬಲಪಾತಿತಧೇನುಕಃ । ಗೋಪೀಸೌಭಾಗ್ಯಸಂಭಾವ್ಯೋ ಗೋಧೂಲಿಚ್ಛುರಿತಾಲಕಃ ॥ 68 ॥

ಗೋಪೀವಿರಹಸಂತಪ್ತೋ ಗೋಪಿಕಾಕೃತಮಜ್ಜನಃ । ಪ್ರಲಂಬಬಾಹುರುತ್ಫುಲ್ಲಪುಂಡರೀಕಾವತಂಸಕಃ ॥ 69 ॥

ವಿಲಾಸಲಲಿತಸ್ಮೇರಗರ್ಭಲೀಲಾವಲೋಕನಃ । ಸ್ರಗ್ಭೂಷಣಾನುಲೇಪಾಢ್ಯೋ ಜನನ್ಯುಪಹೃತಾನ್ನಭುಕ್ ॥ 70 ॥

ವರಶಯ್ಯಾಶಯೋ ರಾಧಾಪ್ರೇಮಸಲ್ಲಾಪನಿರ್ವೃತಃ । ಯಮುನಾತಟಸಂಚಾರೀ ವಿಷಾರ್ತವ್ರಜಹರ್ಷದಃ ॥ 71 ॥

ಕಾಲಿಯಕ್ರೋಧಜನಕಃ ವೃದ್ಧಾಹಿಕುಲವೇಷ್ಟಿತಃ । ಕಾಲಿಯಾಹಿಫಣಾರಂಗನಟಃ ಕಾಲಿಯಮರ್ದನಃ ॥ 72 ॥

ನಾಗಪತ್ನೀಸ್ತುತಿಪ್ರೀತೋ ನಾನಾವೇಷಸಮೃದ್ಧಿಕೃತ್ । ಅವಿಷ್ವಕ್ತದೃಗಾತ್ಮೇಶಃ ಸ್ವದೃಗಾತ್ಮಸ್ತುತಿಪ್ರಿಯಃ ॥ 73 ॥

ಸರ್ವೇಶ್ವರಸ್ಸರ್ವಗುಣಃ ಪ್ರಸಿದ್ಧಸ್ಸರ್ವಸಾತ್ವತಃ । ಅಕುಂಠಧಾಮಾ ಚಂದ್ರಾರ್ಕದೃಷ್ಟಿರಾಕಾಶನಿರ್ಮಲಃ ॥ 74 ॥

ಅನಿರ್ದೇಶ್ಯಗತಿರ್ನಾಗವನಿತಾಪತಿಭೈಕ್ಷದಃ । ಸ್ವಾಂಘ್ರಿಮುದ್ರಾಂಕನಾಗೇಂದ್ರಮೂರ್ಧಾ ಕಾಲಿಯಸಂಸ್ತುತಃ ॥ 75 ॥

ಅಭಯೋ ವಿಶ್ವತಶ್ಚಕ್ಷುಃ ಸ್ತುತೋತ್ತಮಗುಣಃ ಪ್ರಭುಃ । ಅಹಮಾತ್ಮಾ ಮರುತ್ಪ್ರಾಣಃ ಪರಮಾತ್ಮಾ ದ್ಯುಶೀರ್ಷವಾನ್ ॥ 76 ॥

ನಾಗೋಪಾಯನಹೃಷ್ಟಾತ್ಮಾ ಹ್ರದೋತ್ಸಾರಿತಕಾಲಿಯಃ । ಬಲಭದ್ರಸುಖಾಲಾಪೋ ಗೋಪಾಲಿಂಗನನಿರ್ವೃತಃ ॥ 77 ॥

ದಾವಾಗ್ನಿಭೀತಗೋಪಾಲಗೋಪ್ತಾ ದಾವಾಗ್ನಿನಾಶನಃ । ನಯನಾಚ್ಛಾದನಕ್ರೀಡಾಲಂಪಟೋ ನೃಪಚೇಷ್ಟಿತಃ ॥ 78 ॥

ಕಾಕಪಕ್ಷಧರಸ್ಸೌಮ್ಯೋ ಬಲವಾಹಕಕೇಲಿಮಾನ್ । ಬಲಘಾತಿತದುರ್ಧರ್ಷಪ್ರಲಂಬೋ ಬಲವತ್ಸಲಃ ॥ 79 ॥

ಮುಂಜಾಟವ್ಯಗ್ನಿಶಮನಃ ಪ್ರಾವೃಟ್ಕಾಲವಿನೋದವಾನ್ । ಶಿಲಾನ್ಯಸ್ತಾನ್ನಭೃದ್ದೈತ್ಯಸಂಹರ್ತಾ ಶಾದ್ವಲಾಸನಃ ॥ 80 ॥

ಸದಾಪ್ತಗೋಪಿಕೋದ್ಗೀತಃ ಕರ್ಣಿಕಾರಾವತಂಸಕಃ । ನಟವೇಷಧರಃ ಪದ್ಮಮಾಲಾಂಕೋ ಗೋಪಿಕಾವೃತಃ ॥ 81 ॥

ಗೋಪೀಮನೋಹರಾಪಾಂಗೋ ವೇಣುವಾದನತತ್ಪರಃ । ವಿನ್ಯಸ್ತವದನಾಂಭೋಜಶ್ಚಾರುಶಬ್ದಕೃತಾನನಃ ॥ 82 ॥

ಬಿಂಬಾಧರಾರ್ಪಿತೋದಾರವೇಣುರ್ವಿಶ್ವವಿಮೋಹನಃ । ವ್ರಜಸಂವರ್ಣಿತಶ್ರಾವ್ಯವೇಣುನಾದಃ ಶ್ರುತಿಪ್ರಿಯಃ ॥ 83 ॥

ಗೋಗೋಪಗೋಪೀಜನ್ಮೇಪ್ಸುರ್ಬ್ರಹ್ಮೇಂದ್ರಾದ್ಯಭಿವಂದಿತಃ । ಗೀತಸ್ನುತಿಸರಿತ್ಪೂರೋ ನಾದನರ್ತಿತಬರ್ಹಿಣಃ ॥ 84 ॥

ರಾಗಪಲ್ಲವಿತಸ್ಥಾಣುರ್ಗೀತಾನಮಿತಪಾದಪಃ । ವಿಸ್ಮಾರಿತತೃಣಗ್ರಾಸಮೃಗೋ ಮೃಗವಿಲೋಭಿತಃ ॥ 85 ॥

ವ್ಯಾಘ್ರಾದಿಹಿಂಸ್ರಸಹಜವೈರಹರ್ತಾ ಸುಗಾಯನಃ । ಗಾಢೋದೀರಿತಗೋಬೃಂದಪ್ರೇಮೋತ್ಕರ್ಣಿತತರ್ಣಕಃ ॥ 86 ॥

ನಿಷ್ಪಂದಯಾನಬ್ರಹ್ಮಾದಿವೀಕ್ಷಿತೋ ವಿಶ್ವವಂದಿತಃ । ಶಾಖೋತ್ಕರ್ಣಶಕುಂತೌಘಶ್ಛತ್ರಾಯಿತಬಲಾಹಕಃ ॥ 87 ॥

ಪ್ರಸನ್ನಃ ಪರಮಾನಂದಶ್ಚಿತ್ರಾಯಿತಚರಾಚರಃ । ಗೋಪಿಕಾಮದನೋ ಗೋಪೀಕುಚಕುಂಕುಮಮುದ್ರಿತಃ ॥ 88 ॥

ಗೋಪಿಕನ್ಯಾಜಲಕ್ರೀಡಾಹೃಷ್ಟೋ ಗೋಪ್ಯಂಶುಕಾಪಹೃತ್ । ಸ್ಕಂಧಾರೋಪಿತಗೋಪಸ್ತ್ರೀವಾಸಾಃ ಕುಂದನಿಭಸ್ಮಿತಃ ॥ 89 ॥

ಗೋಪೀನೇತ್ರೋತ್ಪಲಶಶೀ ಗೋಪಿಕಾಯಾಚಿತಾಂಶುಕಃ । ಗೋಪೀನಮಸ್ಕ್ರಿಯಾದೇಷ್ಟಾ ಗೋಪ್ಯೇಕಕರವಂದಿತಃ ॥ 90 ॥

ಗೋಪ್ಯಂಜಲಿವಿಶೇಷಾರ್ಥೀ ಗೋಪಕ್ರೀಡಾವಿಲೋಭಿತಃ । ಶಾಂತವಾಸಸ್ಫುರದ್ಗೋಪೀಕೃತಾಂಜಲಿರಘಾಪಹಃ ॥ 91 ॥

ಗೋಪೀಕೇಲಿವಿಲಾಸಾರ್ಥೀ ಗೋಪೀಸಂಪೂರ್ಣಕಾಮದಃ । ಗೋಪಸ್ತ್ರೀವಸ್ತ್ರದೋ ಗೋಪೀಚಿತ್ತಚೋರಃ ಕುತೂಹಲೀ ॥ 92 ॥

ಬೃಂದಾವನಪ್ರಿಯೋ ಗೋಪಬಂಧುರ್ಯಜ್ವಾನ್ನಯಾಚಿತಾ । ಯಜ್ಞೇಶೋ ಯಜ್ಞಭಾವಜ್ಞೋ ಯಜ್ಞಪತ್ನ್ಯಭಿವಾಂಛಿತಃ ॥ 93 ॥

ಮುನಿಪತ್ನೀವಿತೀರ್ಣಾನ್ನತೃಪ್ತೋ ಮುನಿವಧೂಪ್ರಿಯಃ । ದ್ವಿಜಪತ್ನ್ಯಭಿಭಾವಜ್ಞೋ ದ್ವಿಜಪತ್ನೀವರಪ್ರದಃ ॥ 94 ॥

ಪ್ರತಿರುದ್ಧಸತೀಮೋಕ್ಷಪ್ರದೋ ದ್ವಿಜವಿಮೋಹಿತಾ । ಮುನಿಜ್ಞಾನಪ್ರದೋ ಯಜ್ವಸ್ತುತೋ ವಾಸವಯಾಗವಿತ್ ॥ 95 ॥

ಪಿತೃಪ್ರೋಕ್ತಕ್ರಿಯಾರೂಪಶಕ್ರಯಾಗನಿವಾರಣಃ । ಶಕ್ರಾಽಮರ್ಷಕರಶ್ಶಕ್ರವೃಷ್ಟಿಪ್ರಶಮನೋನ್ಮುಖಃ ॥ 96 ॥

ಗೋವರ್ಧನಧರೋ ಗೋಪಗೋಬೃಂದತ್ರಾಣತತ್ಪರಃ । ಗೋವರ್ಧನಗಿರಿಚ್ಛತ್ರಚಂಡದಂಡಭುಜಾರ್ಗಲಃ ॥ 97 ॥

ಸಪ್ತಾಹವಿಧೃತಾದ್ರೀಂದ್ರೋ ಮೇಘವಾಹನಗರ್ವಹಾ । ಭುಜಾಗ್ರೋಪರಿವಿನ್ಯಸ್ತಕ್ಷ್ಮಾಧರಕ್ಷ್ಮಾಭೃದಚ್ಯುತಃ ॥ 98 ॥

ಸ್ವಸ್ಥಾನಸ್ಥಾಪಿತಗಿರಿರ್ಗೋಪೀದಧ್ಯಕ್ಷತಾರ್ಚಿತಃ । ಸುಮನಸ್ಸುಮನೋವೃಷ್ಟಿಹೃಷ್ಟೋ ವಾಸವವಂದಿತಃ ॥ 99 ॥

ಕಾಮಧೇನುಪಯಃಪೂರಾಭಿಷಿಕ್ತಸ್ಸುರಭಿಸ್ತುತಃ । ಧರಾಂಘ್ರಿರೋಷಧೀರೋಮಾ ಧರ್ಮಗೋಪ್ತಾ ಮನೋಮಯಃ ॥ 100 ॥

ಜ್ಞಾನಯಜ್ಞಪ್ರಿಯಶ್ಶಾಸ್ತ್ರನೇತ್ರಸ್ಸರ್ವಾರ್ಥಸಾರಥಿಃ । ಐರಾವತಕರಾನೀತವಿಯದ್ಗಂಗಾಪ್ಲುತೋ ವಿಭುಃ ॥ 101 ॥

ಬ್ರಹ್ಮಾಭಿಷಿಕ್ತೋ ಗೋಗೋಪ್ತಾ ಸರ್ವಲೋಕಶುಭಂಕರಃ । ಸರ್ವವೇದಮಯೋ ಮಗ್ನನಂದಾನ್ವೇಷಿಪಿತೃಪ್ರಿಯಃ ॥ 102 ॥

ವರುಣೋದೀರಿತಾತ್ಮೇಕ್ಷಾಕೌತುಕೋ ವರುಣಾರ್ಚಿತಃ । ವರುಣಾನೀತಜನಕೋ ಗೋಪಜ್ಞಾತಾತ್ಮವೈಭವಃ ॥ 103 ॥

ಸ್ವರ್ಲೋಕಾಲೋಕಸಂಹೃಷ್ಟಗೋಪವರ್ಗತ್ರಿವರ್ಗದಃ । ಬ್ರಹ್ಮಹೃದ್ಗೋಪಿತೋ ಗೋಪದ್ರಷ್ಟಾ ಬ್ರಹ್ಮಪದಪ್ರದಃ ॥ 104 ॥

ಶರಚ್ಚಂದ್ರವಿಹಾರೋತ್ಕಃ ಶ್ರೀಪತಿರ್ವಶಕೋ ಕ್ಷಮಃ । ಭಯಾಪಹೋ ಭರ್ತೃರುದ್ಧಗೋಪಿಕಾಧ್ಯಾನಗೋಚರಃ ॥ 105 ॥

ಗೋಪಿಕಾನಯನಾಸ್ವಾದ್ಯೋ ಗೋಪೀನರ್ಮೋಕ್ತಿನಿರ್ವೃತಃ । ಗೋಪಿಕಾಮಾನಹರಣೋ ಗೋಪಿಕಾಶತಯೂಥಪಃ ॥ 106 ॥

ವೈಜಯಂತೀಸ್ರಗಾಕಲ್ಪೋ ಗೋಪಿಕಾಮಾನವರ್ಧನಃ । ಗೋಪಕಾಂತಾಸುನಿರ್ದೇಷ್ಟಾ ಕಾಂತೋ ಮನ್ಮಥಮನ್ಮಥಃ ॥ 107 ॥

ಸ್ವಾತ್ಮಾಸ್ಯದತ್ತತಾಂಬೂಲಃ ಫಲಿತೋತ್ಕೃಷ್ಟಯೌವನಃ । ವಲ್ಲವೀಸ್ತನಸಕ್ತಾಕ್ಷೋ ವಲ್ಲವೀಪ್ರೇಮಚಾಲಿತಃ ॥ 108 ॥

ಗೋಪೀಚೇಲಾಂಚಲಾಸೀನೋ ಗೋಪೀನೇತ್ರಾಬ್ಜಷಟ್ಪದಃ । ರಾಸಕ್ರೀಡಾಸಮಾಸಕ್ತೋ ಗೋಪೀಮಂಡಲಮಂಡನಃ ॥ 109 ॥

ಗೋಪೀಹೇಮಮಣಿಶ್ರೇಣಿಮಧ್ಯೇಂದ್ರಮಣಿರುಜ್ಜ್ವಲಃ । ವಿದ್ಯಾಧರೇಂದುಶಾಪಘ್ನಶ್ಶಂಖಚೂಡಶಿರೋಹರಃ ॥ 110 ॥

ಶಂಖಚೂಡಶಿರೋರತ್ನಸಂಪ್ರೀಣಿತಬಲೋಽನಘಃ । ಅರಿಷ್ಟಾರಿಷ್ಟಕೃದ್ದುಷ್ಟಕೇಶಿದೈತ್ಯನಿಷೂದನಃ ॥ 111 ॥

ಸರಸಸ್ಸಸ್ಮಿತಮುಖಸ್ಸುಸ್ಥಿರೋ ವಿರಹಾಕುಲಃ । ಸಂಕರ್ಷಣಾರ್ಪಿತಪ್ರೀತಿರಕ್ರೂರಧ್ಯಾನಗೋಚರಃ ॥ 112 ॥

ಅಕ್ರೂರಸಂಸ್ತುತೋ ಗೂಢೋ ಗುಣವೃತ್ಯುಪಲಕ್ಷಿತಃ । ಪ್ರಮಾಣಗಮ್ಯಸ್ತನ್ಮಾತ್ರಾಽವಯವೀ ಬುದ್ಧಿತತ್ಪರಃ ॥ 113 ॥

ಸರ್ವಪ್ರಮಾಣಪ್ರಮಧೀಸ್ಸರ್ವಪ್ರತ್ಯಯಸಾಧಕಃ । ಪುರುಷಶ್ಚ ಪ್ರಧಾನಾತ್ಮಾ ವಿಪರ್ಯಾಸವಿಲೋಚನಃ ॥ 114 ॥

ಮಧುರಾಜನಸಂವೀಕ್ಷ್ಯೋ ರಜಕಪ್ರತಿಘಾತಕಃ । ವಿಚಿತ್ರಾಂಬರಸಂವೀತೋ ಮಾಲಾಕಾರವರಪ್ರದಃ ॥ 115 ॥

ಕುಬ್ಜಾವಕ್ರತ್ವನಿರ್ಮೋಕ್ತಾ ಕುಬ್ಜಾಯೌವನದಾಯಕಃ । ಕುಬ್ಜಾಂಗರಾಗಸುರಭಿಃ ಕಂಸಕೋದಂಡಖಂಡನಃ ॥ 116 ॥

ಧೀರಃ ಕುವಲಯಾಪೀಡಮರ್ದನಃ ಕಂಸಭೀತಿಕೃತ್ । ದಂತಿದಂತಾಯುಧೋ ರಂಗತ್ರಾಸಕೋ ಮಲ್ಲಯುದ್ಧವಿತ್ ॥ 117 ॥

ಚಾಣೂರಹಂತಾ ಕಂಸಾರಿರ್ದೇವಕೀಹರ್ಷದಾಯಕಃ । ವಸುದೇವಪದಾನಮ್ರಃ ಪಿತೃಬಂಧವಿಮೋಚನಃ ॥ 118 ॥

ಉರ್ವೀಭಯಾಪಹೋ ಭೂಪ ಉಗ್ರಸೇನಾಧಿಪತ್ಯದಃ । ಆಜ್ಞಾಸ್ಥಿತಶಚೀನಾಥಸ್ಸುಧರ್ಮಾನಯನಕ್ಷಮಃ ॥ 119 ॥

ಆದ್ಯೋ ದ್ವಿಜಾತಿಸತ್ಕರ್ತಾ ಶಿಷ್ಟಾಚಾರಪ್ರದರ್ಶಕಃ । ಸಾಂದೀಪನಿಕೃತಾಭ್ಯಸ್ತವಿದ್ಯಾಭ್ಯಾಸೈಕಧೀಸ್ಸುಧೀಃ ॥ 120 ॥

ಗುರ್ವಭೀಷ್ಟಕ್ರಿಯಾದಕ್ಷಃ ಪಶ್ಚಿಮೋದಧಿಪೂಜಿತಃ । ಹತಪಂಚಜನಪ್ರಾಪ್ತಪಾಂಚಜನ್ಯೋ ಯಮಾರ್ಚಿತಃ ॥ 121 ॥

ಧರ್ಮರಾಜಜಯಾನೀತಗುರುಪುತ್ರ ಉರುಕ್ರಮಃ । ಗುರುಪುತ್ರಪ್ರದಶ್ಶಾಸ್ತಾ ಮಧುರಾಜಸಭಾಸದಃ ॥ 122 ॥

ಜಾಮದಗ್ನ್ಯಸಮಭ್ಯರ್ಚ್ಯೋ ಗೋಮಂತಗಿರಿಸಂಚರಃ । ಗೋಮಂತದಾವಶಮನೋ ಗರುಡಾನೀತಭೂಷಣಃ ॥ 123 ॥

ಚಕ್ರಾದ್ಯಾಯುಧಸಂಶೋಭೀ ಜರಾಸಂಧಮದಾಪಹಃ । ಸೃಗಾಲಾವನಿಪಾಲಘ್ನಸ್ಸೃಗಾಲಾತ್ಮಜರಾಜ್ಯದಃ ॥ 124 ॥

ವಿಧ್ವಸ್ತಕಾಲಯವನೋ ಮುಚುಕುಂದವರಪ್ರದಃ । ಆಜ್ಞಾಪಿತಮಹಾಂಭೋಧಿರ್ದ್ವಾರಕಾಪುರಕಲ್ಪನಃ ॥ 125 ॥

ದ್ವಾರಕಾನಿಲಯೋ ರುಕ್ಮಿಮಾನಹಂತಾ ಯದೂದ್ವಹಃ । ರುಚಿರೋ ರುಕ್ಮಿಣೀಜಾನಿಃ ಪ್ರದ್ಯುಮ್ನಜನಕಃ ಪ್ರಭುಃ ॥ 126 ॥

ಅಪಾಕೃತತ್ರಿಲೋಕಾರ್ತಿರನಿರುದ್ಧಪಿತಾಮಹಃ । ಅನಿರುದ್ಧಪದಾನ್ವೇಷೀ ಚಕ್ರೀ ಗರುಡವಾಹನಃ ॥ 127 ॥

ಬಾಣಾಸುರಪುರೀರೋದ್ಧಾ ರಕ್ಷಾಜ್ವಲನಯಂತ್ರಜಿತ್ । ಧೂತಪ್ರಮಥಸಂರಂಭೋ ಜಿತಮಾಹೇಶ್ವರಜ್ವರಃ ॥ 128 ॥

ಷಟ್ಚಕ್ರಶಕ್ತಿನಿರ್ಜೇತಾ ಭೂತವೇತಾಲಮೋಹಕೃತ್ । ಶಂಭುತ್ರಿಶೂಲಜಿಚ್ಛಂಭುಜೃಂಭಣಶ್ಶಂಭುಸಂಸ್ತುತಃ ॥ 129 ॥

ಇಂದ್ರಿಯಾತ್ಮೇಂದುಹೃದಯಸ್ಸರ್ವಯೋಗೇಶ್ವರೇಶ್ವರಃ । ಹಿರಣ್ಯಗರ್ಭಹೃದಯೋ ಮೋಹಾವರ್ತನಿವರ್ತನಃ ॥ 130 ॥

ಆತ್ಮಜ್ಞಾನನಿಧಿರ್ಮೇಧಾ ಕೋಶಸ್ತನ್ಮಾತ್ರರೂಪವಾನ್ । ಇಂದ್ರೋಽಗ್ನಿವದನಃ ಕಾಲನಾಭಸ್ಸರ್ವಾಗಮಾಧ್ವಗಃ ॥ 131 ॥

ತುರೀಯಸರ್ವಧೀಸಾಕ್ಷೀ ದ್ವಂದ್ವಾರಾಮಾತ್ಮದೂರಗಃ । ಅಜ್ಞಾತಪಾರೋ ವಶ್ಯಶ್ರೀರವ್ಯಾಕೃತವಿಹಾರವಾನ್ ॥ 132 ॥

ಆತ್ಮಪ್ರದೀಪೋ ವಿಜ್ಞಾನಮಾತ್ರಾತ್ಮಾ ಶ್ರೀನಿಕೇತನಃ । ಬಾಣಬಾಹುವನಚ್ಛೇತ್ತಾ ಮಹೇಂದ್ರಪ್ರೀತಿವರ್ಧನಃ ॥ 133 ॥

ಅನಿರುದ್ಧನಿರೋಧಜ್ಞೋ ಜಲೇಶಾಹೃತಗೋಕುಲಃ । ಜಲೇಶವಿಜಯೀ ವೀರಸ್ಸತ್ರಾಜಿದ್ರತ್ನಯಾಚಕಃ ॥ 134 ॥

ಪ್ರಸೇನಾನ್ವೇಷಣೋದ್ಯುಕ್ತೋ ಜಾಂಬವದ್ಧೃತರತ್ನದಃ । ಜಿತರ್ಕ್ಷರಾಜತನಯಾಹರ್ತಾ ಜಾಂಬವತೀಪ್ರಿಯಃ ॥ 135 ॥

ಸತ್ಯಭಾಮಾಪ್ರಿಯಃ ಕಾಮಶ್ಶತಧನ್ವಶಿರೋಹರಃ । ಕಾಲಿಂದೀಪತಿರಕ್ರೂರಬಂಧುರಕ್ರೂರರತ್ನದಃ ॥ 136 ॥

ಕೈಕೇಯೀರಮಣೋ ಭದ್ರಾಭರ್ತಾ ನಾಗ್ನಜಿತೀಧವಃ । ಮಾದ್ರೀಮನೋಹರಶ್ಶೈಬ್ಯಾಪ್ರಾಣಬಂಧುರುರುಕ್ರಮಃ ॥ 137 ॥

ಸುಶೀಲಾದಯಿತೋ ಮಿತ್ರವಿಂದಾನೇತ್ರಮಹೋತ್ಸವಃ । ಲಕ್ಷ್ಮಣಾವಲ್ಲಭೋ ರುದ್ಧಪ್ರಾಗ್ಜ್ಯೋತಿಷಮಹಾಪುರಃ ॥ 138 ॥

ಸುರಪಾಶಾವೃತಿಚ್ಛೇದೀ ಮುರಾರಿಃ ಕ್ರೂರಯುದ್ಧವಿತ್ । ಹಯಗ್ರೀವಶಿರೋಹರ್ತಾ ಸರ್ವಾತ್ಮಾ ಸರ್ವದರ್ಶನಃ ॥ 139 ॥

ನರಕಾಸುರವಿಚ್ಛೇತ್ತಾ ನರಕಾತ್ಮಜರಾಜ್ಯದಃ। ಪೃಥ್ವೀಸ್ತುತಃ ಪ್ರಕಾಶಾತ್ಮಾ ಹೃದ್ಯೋ ಯಜ್ಞಫಲಪ್ರದಃ ॥ 140 ॥

ಗುಣಗ್ರಾಹೀ ಗುಣದ್ರಷ್ಟಾ ಗೂಢಸ್ವಾತ್ಮಾ ವಿಭೂತಿಮಾನ್ । ಕವಿರ್ಜಗದುಪದ್ರಷ್ಟಾ ಪರಮಾಕ್ಷರವಿಗ್ರಹಃ ॥ 141 ॥

ಪ್ರಪನ್ನಪಾಲನೋ ಮಾಲೀ ಮಹದ್ಬ್ರಹ್ಮವಿವರ್ಧನಃ । ವಾಚ್ಯವಾಚಕಶಕ್ತ್ಯರ್ಥಸ್ಸರ್ವವ್ಯಾಕೃತಸಿದ್ಧಿದಃ ॥ 142 ॥

ಸ್ವಯಂಪ್ರಭುರನಿರ್ವೇದ್ಯಸ್ಸ್ವಪ್ರಕಾಶಶ್ಚಿರಂತನಃ । ನಾದಾತ್ಮಾ ಮಂತ್ರಕೋಟೀಶೋ ನಾನಾವಾದನಿರೋಧಕಃ ॥ 143 ॥

ಕಂದರ್ಪಕೋಟಿಲಾವಣ್ಯಃ ಪರಾರ್ಥೈಕಪ್ರಯೋಜಕಃ । ಅಮರೀಕೃತದೇವೌಘಃ ಕನ್ಯಕಾಬಂಧಮೋಚನಃ ॥ 144 ॥

ಷೋಡಶಸ್ತ್ರೀಸಹಸ್ರೇಶಃ ಕಾಂತಃ ಕಾಂತಾಮನೋಭವಃ । ಕ್ರೀಡಾರತ್ನಾಚಲಾಹರ್ತಾ ವರುಣಚ್ಛತ್ರಶೋಭಿತಃ ॥ 145 ॥

ಶಕ್ರಾಭಿವಂದಿತಶ್ಶಕ್ರಜನನೀಕುಂಡಲಪ್ರದಃ । ಅದಿತಿಪ್ರಸ್ತುತಸ್ತೋತ್ರೋ ಬ್ರಾಹ್ಮಣೋದ್ಘುಷ್ಟಚೇಷ್ಟನಃ ॥ 146 ॥

ಪುರಾಣಸ್ಸಂಯಮೀ ಜನ್ಮಾಲಿಪ್ತಃ ಷಡ್ವಿಂಶಕೋಽರ್ಥದಃ । ಯಶಸ್ಯನೀತಿರಾದ್ಯಂತರಹಿತಸ್ಸತ್ಕಥಾಪ್ರಿಯಃ ॥ 147 ॥

ಬ್ರಹ್ಮಬೋಧಃ ಪರಾನಂದಃ ಪಾರಿಜಾತಾಪಹಾರಕಃ । ಪೌಂಡ್ರಕಪ್ರಾಣಹರಣಃ ಕಾಶಿರಾಜನಿಷೂದನಃ ॥ 148 ॥

ಕೃತ್ಯಾಗರ್ವಪ್ರಶಮನೋ ವಿಚಕ್ರವಧದೀಕ್ಷಿತಃ । ಕಂಸವಿಧ್ವಂಸನಸ್ಸಾಂಬಜನಕೋ ಡಿಂಭಕಾರ್ದನಃ ॥ 149 ॥

ಮುನಿರ್ಗೋಪ್ತಾ ಪಿತೃವರಪ್ರದಸ್ಸವನದೀಕ್ಷಿತಃ । ರಥೀ ಸಾರಥ್ಯನಿರ್ದೇಷ್ಟಾ ಫಾಲ್ಗುನಃ ಫಾಲ್ಗುನಿಪ್ರಿಯಃ ॥ 150 ॥

ಸಪ್ತಾಬ್ಧಿಸ್ತಂಭನೋದ್ಭಾತೋ ಹರಿಸ್ಸಪ್ತಾಬ್ಧಿಭೇದನಃ । ಆತ್ಮಪ್ರಕಾಶಃ ಪೂರ್ಣಶ್ರೀರಾದಿನಾರಾಯಣೇಕ್ಷಿತಃ ॥ 151 ॥

ವಿಪ್ರಪುತ್ರಪ್ರದಶ್ಚೈವ ಸರ್ವಮಾತೃಸುತಪ್ರದಃ । ಪಾರ್ಥವಿಸ್ಮಯಕೃತ್ಪಾರ್ಥಪ್ರಣವಾರ್ಥಪ್ರಬೋಧನಃ ॥ 152 ॥

ಕೈಲಾಸಯಾತ್ರಾಸುಮುಖೋ ಬದರ್ಯಾಶ್ರಮಭೂಷಣಃ । ಘಂಟಾಕರ್ಣಕ್ರಿಯಾಮೌಢ್ಯಾತ್ತೋಷಿತೋ ಭಕ್ತವತ್ಸಲಃ ॥ 153 ॥

ಮುನಿಬೃಂದಾದಿಭಿರ್ಧ್ಯೇಯೋ ಘಂಟಾಕರ್ಣವರಪ್ರದಃ । ತಪಶ್ಚರ್ಯಾಪರಶ್ಚೀರವಾಸಾಃ ಪಿಂಗಜಟಾಧರಃ ॥ 154 ॥

ಪ್ರತ್ಯಕ್ಷೀಕೃತಭೂತೇಶಶ್ಶಿವಸ್ತೋತಾ ಶಿವಸ್ತುತಃ । ಕೃಷ್ಣಾಸ್ವಯಂವರಾಲೋಕಕೌತುಕೀ ಸರ್ವಸಮ್ಮತಃ ॥ 155 ॥

ಬಲಸಂರಂಭಶಮನೋ ಬಲದರ್ಶಿತಪಾಂಡವಃ । ಯತಿವೇಷಾರ್ಜುನಾಭೀಷ್ಟದಾಯೀ ಸರ್ವಾತ್ಮಗೋಚರಃ ॥ 156 ॥

ಸುಭದ್ರಾಫಾಲ್ಗುನೋದ್ವಾಹಕರ್ತಾ ಪ್ರೀಣಿತಫಾಲ್ಗುನಃ । ಖಾಂಡವಪ್ರೀಣಿತಾರ್ಚಿಷ್ಮಾನ್ಮಯದಾನವಮೋಚನಃ ॥ 157 ॥

ಸುಲಭೋ ರಾಜಸೂಯಾರ್ಹಯುಧಿಷ್ಠಿರನಿಯೋಜಕಃ । ಭೀಮಾರ್ದಿತಜರಾಸಂಧೋ ಮಾಗಧಾತ್ಮಜರಾಜ್ಯದಃ ॥ 158 ॥

ರಾಜಬಂಧನನಿರ್ಮೋಕ್ತಾ ರಾಜಸೂಯಾಗ್ರಪೂಜನಃ । ಚೈದ್ಯಾದ್ಯಸಹನೋ ಭೀಷ್ಮಸ್ತುತಸ್ಸಾತ್ವತಪೂರ್ವಜಃ ॥ 159 ॥

ಸರ್ವಾತ್ಮಾರ್ಥಸಮಾಹರ್ತಾ ಮಂದರಾಚಲಧಾರಕಃ । ಯಜ್ಞಾವತಾರಃ ಪ್ರಹ್ಲಾದಪ್ರತಿಜ್ಞಾಪ್ರತಿಪಾಲಕಃ ॥ 160 ॥

ಬಲಿಯಜ್ಞಸಭಾಧ್ವಂಸೀ ದೃಪ್ತಕ್ಷತ್ರಕುಲಾಂತಕಃ । ದಶಗ್ರೀವಾಂತಕೋ ಜೇತಾ ರೇವತೀಪ್ರೇಮವಲ್ಲಭಃ ॥ 161 ॥

ಸರ್ವಾವತಾರಾಧಿಷ್ಠಾತಾ ವೇದಬಾಹ್ಯವಿಮೋಹನಃ । ಕಲಿದೋಷನಿರಾಕರ್ತಾ ದಶನಾಮಾ ದೃಢವ್ರತಃ ॥ 162 ॥

ಅಮೇಯಾತ್ಮಾ ಜಗತ್ಸ್ವಾಮೀ ವಾಗ್ಮೀ ಚೈದ್ಯಶಿರೋಹರಃ । ದ್ರೌಪದೀರಚಿತಸ್ತೋತ್ರಃ ಕೇಶವಃ ಪುರುಷೋತ್ತಮಃ ॥ 163 ॥

ನಾರಾಯಣೋ ಮಧುಪತಿರ್ಮಾಧವೋ ದೋಷವರ್ಜಿತಃ । ಗೋವಿಂದಃ ಪುಂಡರೀಕಾಕ್ಷೋ ವಿಷ್ಣುಶ್ಚ ಮಧುಸೂದನಃ ॥ 164 ॥

ತ್ರಿವಿಕ್ರಮಸ್ತ್ರಿಲೋಕೇಶೋ ವಾಮನಃ ಶ್ರೀಧರಃ ಪುಮಾನ್ । ಹೃಷೀಕೇಶೋ ವಾಸುದೇವಃ ಪದ್ಮನಾಭೋ ಮಹಾಹ್ರದಃ ॥ 165 ॥

ದಾಮೋದರಶ್ಚತುರ್ವ್ಯೂಹಃ ಪಾಂಚಾಲೀಮಾನರಕ್ಷಣಃ । ಸಾಲ್ವಘ್ನಸ್ಸಮರಶ್ಲಾಘೀ ದಂತವಕ್ತ್ರನಿಬರ್ಹಣಃ ॥ 166 ॥

ದಾಮೋದರಪ್ರಿಯಸಖಾ ಪೃಥುಕಾಸ್ವಾದನಪ್ರಿಯಃ ॥

ಘೃಣೀ ದಾಮೋದರಃ ಶ್ರೀದೋ ಗೋಪೀಪುನರವೇಕ್ಷಕಃ ॥ 167 ॥

ಗೋಪಿಕಾಮುಕ್ತಿದೋ ಯೋಗೀ ದುರ್ವಾಸಸ್ತೃಪ್ತಿಕಾರಕಃ । ಅವಿಜ್ಞಾತವ್ರಜಾಕೀರ್ಣಪಾಂಡವಾಲೋಕನೋ ಜಯೀ ॥ 168 ॥

ಪಾರ್ಥಸಾರಥ್ಯನಿರತಃ ಪ್ರಾಜ್ಞಃ ಪಾಂಡವದೂತ್ಯಕೃತ್ । ವಿದುರಾತಿಥ್ಯಸಂತುಷ್ಟಃ ಕುಂತೀಸಂತೋಷದಾಯಕಃ ॥ 169 ॥

ಸುಯೋಧನತಿರಸ್ಕರ್ತಾ ದುರ್ಯೋಧನವಿಕಾರವಿತ್ । ವಿದುರಾಭಿಷ್ಠುತೋ ನಿತ್ಯೋ ವಾರ್ಷ್ಣೇಯೋ ಮಂಗಲಾತ್ಮಕಃ ॥ 170 ॥

ಪಂಚವಿಂಶತಿತತ್ತ್ವೇಶಶ್ಚತುರ್ವಿಂಶತಿದೇಹಭಾಕ್ । ಸರ್ವಾನುಗ್ರಾಹಕಸ್ಸರ್ವದಾಶಾರ್ಹಸತತಾರ್ಚಿತಃ ॥ 171 ॥

ಅಚಿಂತ್ಯೋ ಮಧುರಾಲಾಪಸ್ಸಾಧುದರ್ಶೀ ದುರಾಸದಃ । ಮನುಷ್ಯಧರ್ಮಾನುಗತಃ ಕೌರವೇಂದ್ರಕ್ಷಯೇಕ್ಷಿತಾ ॥ 172 ॥

ಉಪೇಂದ್ರೋ ದಾನವಾರಾತಿರುರುಗೀತೋ ಮಹಾದ್ಯುತಿಃ । ಬ್ರಹ್ಮಣ್ಯದೇವಃ ಶ್ರುತಿಮಾನ್ ಗೋಬ್ರಾಹ್ಮಣಹಿತಾಶಯಃ ॥ 173 ॥

ವರಶೀಲಶ್ಶಿವಾರಂಭಸ್ಸುವಿಜ್ಞಾನವಿಮೂರ್ತಿಮಾನ್ । ಸ್ವಭಾವಶುದ್ಧಸ್ಸನ್ಮಿತ್ರಸ್ಸುಶರಣ್ಯಸ್ಸುಲಕ್ಷಣಃ ॥ 174 ॥

ಧೃತರಾಷ್ಟ್ರಗತೌದೃಷ್ಟಿಪ್ರದಃ ಕರ್ಣವಿಭೇದನಃ । ಪ್ರತೋದಧೃಗ್ವಿಶ್ವರೂಪವಿಸ್ಮಾರಿತಧನಂಜಯಃ ॥ 175 ॥

ಸಾಮಗಾನಪ್ರಿಯೋ ಧರ್ಮಧೇನುರ್ವರ್ಣೋತ್ತಮೋಽವ್ಯಯಃ । ಚತುರ್ಯುಗಕ್ರಿಯಾಕರ್ತಾ ವಿಶ್ವರೂಪಪ್ರದರ್ಶಕಃ ॥ 176 ॥

ಬ್ರಹ್ಮಬೋಧಪರಿತ್ರಾತಪಾರ್ಥೋ ಭೀಷ್ಮಾರ್ಥಚಕ್ರಭೃತ್ । ಅರ್ಜುನಾಯಾಸವಿಧ್ವಂಸೀ ಕಾಲದಂಷ್ಟ್ರಾವಿಭೂಷಣಃ ॥ 177 ॥

ಸುಜಾತಾನಂತಮಹಿಮಾ ಸ್ವಪ್ನವ್ಯಾಪಾರಿತಾರ್ಜುನಃ । ಅಕಾಲಸಂಧ್ಯಾಘಟನಶ್ಚಕ್ರಾಂತರಿತಭಾಸ್ಕರಃ ॥ 178 ॥

ದುಷ್ಟಪ್ರಮಥನಃ ಪಾರ್ಥಪ್ರತಿಜ್ಞಾಪರಿಪಾಲಕಃ । ಸಿಂಧುರಾಜಶಿರಃಪಾತಸ್ಥಾನವಕ್ತಾ ವಿವೇಕದೃಕ್ ॥ 179 ॥

ಸುಭದ್ರಾಶೋಕಹರಣೋ ದ್ರೋಣೋತ್ಸೇಕಾದಿವಿಸ್ಮಿತಃ । ಪಾರ್ಥಮನ್ಯುನಿರಾಕರ್ತಾ ಪಾಂಡವೋತ್ಸವದಾಯಕಃ ॥ 180 ॥

ಅಂಗುಷ್ಠಾಕ್ರಾಂತಕೌಂತೇಯರಥಶ್ಶಕ್ತೋಽಹಿಶೀರ್ಷಜಿತ್ । ಕಾಲಕೋಪಪ್ರಶಮನೋ ಭೀಮಸೇನಜಯಪ್ರದಃ ॥ 181 ॥

ಅಶ್ವತ್ಥಾಮವಧಾಯಾಸತ್ರಾತಪಾಂಡುಸುತಃ ಕೃತೀ । ಇಷೀಕಾಸ್ತ್ರಪ್ರಶಮನೋ ದ್ರೌಣಿರಕ್ಷಾವಿಚಕ್ಷಣಃ ॥ 182 ॥

ಪಾರ್ಥಾಪಹಾರಿತದ್ರೌಣಿಚೂಡಾಮಣಿರಭಂಗುರಃ । ಧೃತರಾಷ್ಟ್ರಪರಾಮೃಷ್ಟಭೀಮಪ್ರತಿಕೃತಿಸ್ಮಯಃ ॥ 183 ॥

ಭೀಷ್ಮಬುದ್ಧಿಪ್ರದಶ್ಶಾಂತಶ್ಶರಚ್ಚಂದ್ರನಿಭಾನನಃ । ಗದಾಗ್ರಜನ್ಮಾ ಪಾಂಚಾಲೀಪ್ರತಿಜ್ಞಾಪರಿಪಾಲಕಃ ॥ 184 ॥

ಗಾಂಧಾರೀಕೋಪದೃಗ್ಗುಪ್ತಧರ್ಮಸೂನುರನಾಮಯಃ । ಪ್ರಪನ್ನಾರ್ತಿಭಯಚ್ಛೇತ್ತಾ ಭೀಷ್ಮಶಲ್ಯವ್ಯಧಾವಹಃ ॥ 185 ॥

ಶಾಂತಶ್ಶಾಂತನವೋದೀರ್ಣಸರ್ವಧರ್ಮಸಮಾಹಿತಃ । ಸ್ಮಾರಿತಬ್ರಹ್ಮವಿದ್ಯಾರ್ಥಪ್ರೀತಪಾರ್ಥೋ ಮಹಾಸ್ತ್ರವಿತ್ ॥ 186 ॥

ಪ್ರಸಾದಪರಮೋದಾರೋ ಗಾಂಗೇಯಸುಗತಿಪ್ರದಃ । ವಿಪಕ್ಷಪಕ್ಷಕ್ಷಯಕೃತ್ಪರೀಕ್ಷಿತ್ಪ್ರಾಣರಕ್ಷಣಃ ॥ 187 ॥

ಜಗದ್ಗುರುರ್ಧರ್ಮಸೂನೋರ್ವಾಜಿಮೇಧಪ್ರವರ್ತಕಃ । ವಿಹಿತಾರ್ಥಾಪ್ತಸತ್ಕಾರೋ ಮಾಸಕಾತ್ಪರಿವರ್ತದಃ ॥ 188 ॥

ಉತ್ತಂಕಹರ್ಷದಾತ್ಮೀಯದಿವ್ಯರೂಪಪ್ರದರ್ಶಕಃ । ಜನಕಾವಗತಸ್ವೋಕ್ತಭಾರತಸ್ಸರ್ವಭಾವನಃ ॥ 189 ॥

ಅಸೋಢಯಾದವೋದ್ರೇಕೋ ವಿಹಿತಾಪ್ತಾದಿಪೂಜನಃ ॥

ಸಮುದ್ರಸ್ಥಾಪಿತಾಶ್ಚರ್ಯಮುಸಲೋ ವೃಷ್ಣಿವಾಹಕಃ ॥ 190 ॥

ಮುನಿಶಾಪಾಯುಧಃ ಪದ್ಮಾಸನಾದಿತ್ರಿದಶಾರ್ಥಿತಃ । ವೃಷ್ಟಿಪ್ರತ್ಯವಹಾರೋತ್ಕಸ್ಸ್ವಧಾಮಗಮನೋತ್ಸುಕಃ ॥ 191 ॥

ಪ್ರಭಾಸಾಲೋಕನೋದ್ಯುಕ್ತೋ ನಾನಾವಿಧನಿಮಿತ್ತಕೃತ್ । ಸರ್ವಯಾದವಸಂಸೇವ್ಯಸ್ಸರ್ವೋತ್ಕೃಷ್ಟಪರಿಚ್ಛದಃ ॥ 192 ॥

ವೇಲಾಕಾನನಸಂಚಾರೀ ವೇಲಾನಿಲಹೃತಶ್ರಮಃ । ಕಾಲಾತ್ಮಾ ಯಾದವೋಽನಂತಸ್ಸ್ತುತಿಸಂತುಷ್ಟಮಾನಸಃ ॥ 193 ॥

ದ್ವಿಜಾಲೋಕನಸಂತುಷ್ಟಃ ಪುಣ್ಯತೀರ್ಥಮಹೋತ್ಸವಃ । ಸತ್ಕಾರಾಹ್ಲಾದಿತಾಶೇಷಭೂಸುರಸ್ಸುರವಲ್ಲಭಃ ॥ 194 ॥

ಪುಣ್ಯತೀರ್ಥಾಪ್ಲುತಃ ಪುಣ್ಯಃ ಪುಣ್ಯದಸ್ತೀರ್ಥಪಾವನಃ । ವಿಪ್ರಸಾತ್ಕೃತಗೋಕೋಟಿಶ್ಶತಕೋಟಿಸುವರ್ಣದಃ ॥ 195 ॥

ಸ್ವಮಾಯಾಮೋಹಿತಾಽಶೇಷವೃಷ್ಣಿವೀರೋ ವಿಶೇಷವಿತ್ । ಜಲಜಾಯುಧನಿರ್ದೇಷ್ಟಾ ಸ್ವಾತ್ಮಾವೇಶಿತಯಾದವಃ ॥ 196 ॥

ದೇವತಾಭೀಷ್ಟವರದಃ ಕೃತಕೃತ್ಯಃ ಪ್ರಸನ್ನಧೀಃ । ಸ್ಥಿರಶೇಷಾಯುತಬಲಸ್ಸಹಸ್ರಫಣಿವೀಕ್ಷಣಃ ॥ 197 ॥

ಬ್ರಹ್ಮವೃಕ್ಷವರಚ್ಛಾಯಾಸೀನಃ ಪದ್ಮಾಸನಸ್ಥಿತಃ । ಪ್ರತ್ಯಗಾತ್ಮಾ ಸ್ವಭಾವಾರ್ಥಃ ಪ್ರಣಿಧಾನಪರಾಯಣಃ ॥ 198 ॥

ವ್ಯಾಧೇಷುವಿದ್ಧಪೂಜ್ಯಾಂಘ್ರಿರ್ನಿಷಾದಭಯಮೋಚನಃ । ಪುಲಿಂದಸ್ತುತಿಸಂತುಷ್ಟಃ ಪುಲಿಂದಸುಗತಿಪ್ರದಃ ॥ 199 ॥

ದಾರುಕಾರ್ಪಿತಪಾರ್ಥಾದಿಕರಣೀಯೋಕ್ತಿರೀಶಿತಾ । ದಿವ್ಯದುಂದುಭಿಸಂಯುಕ್ತಃ ಪುಷ್ಪವೃಷ್ಟಿಪ್ರಪೂಜಿತಃ ॥ 200 ॥

ಪುರಾಣಃ ಪರಮೇಶಾನಃ ಪೂರ್ಣಭೂಮಾ ಪರಿಷ್ಟುತಃ । ಪತಿರಾದ್ಯಃ ಪರಂ ಬ್ರಹ್ಮ ಪರಮಾತ್ಮಾ ಪರಾತ್ಪರಃ ॥ 201 ॥

ಶ್ರೀಪರಮಾತ್ಮಾ ಪರಾತ್ಪರಃ ಓಂ ನಮಃ ಇತಿ । ಫಲಶ್ರುತಿಃ – ಇದಂ ಸಹಸ್ರಂ ಕೃಷ್ಣಸ್ಯ ನಾಮ್ನಾಂ ಸರ್ವಾರ್ಥದಾಯಕಮ್ । ಅನಂತರೂಪೀ ಭಗವಾನ್ ವ್ಯಾಖ್ಯಾತಾದೌ ಸ್ವಯಂಭುವೇ ॥ 202 ॥

ತೇನ ಪ್ರೋಕ್ತಂ ವಸಿಷ್ಠಾಯ ತತೋ ಲಬ್ಧ್ವಾ ಪರಾಶರಃ । ವ್ಯಾಸಾಯ ತೇನ ಸಂಪ್ರೋಕ್ತಂ ಶುಕೋ ವ್ಯಾಸಾದವಾಪ್ತವಾನ್ ॥ 203 ॥

ತಚ್ಛಿಷ್ಯೈರ್ಬಹುಭಿರ್ಭೂಮೌ ಖ್ಯಾಪಿತಂ ದ್ವಾಪರೇ ಯುಗೇ । ಕೃಷ್ಣಾಜ್ಞಯಾ ಹರಿಹರಃ ಕಲೌ ಪ್ರಖ್ಯಾಪಯದ್ವಿಭುಃ ॥ 204 ॥

ಇದಂ ಪಠತಿ ಭಕ್ತ್ಯಾ ಯಃ ಶೃಣೋತಿ ಚ ಸಮಾಹಿತಃ । ಸ್ವಸಿದ್ಧ್ಯೈ ಪ್ರಾರ್ಥಯಂತ್ಯೇನಂ ತೀರ್ಥಕ್ಷೇತ್ರಾದಿದೇವತಾಃ ॥ 205 ॥

ಪ್ರಾಯಶ್ಚಿತ್ತಾನ್ಯಶೇಷಾಣಿ ನಾಲಂ ಯಾನಿ ವ್ಯಪೋಹಿತುಮ್ । ತಾನಿ ಪಾಪಾನಿ ನಶ್ಯಂತಿ ಸಕೃದಸ್ಯ ಪ್ರಶಂಸನಾತ್ ॥ 206 ॥

ಋಣತ್ರಯವಿಮುಕ್ತಸ್ಯ ಶ್ರೌತಸ್ಮಾರ್ತಾನುವರ್ತಿನಃ । ಋಷೇಸ್ತ್ರಿಮೂರ್ತಿರೂಪಸ್ಯ ಫಲಂ ವಿಂದೇದಿದಂ ಪಠನ್ ॥ 207 ॥

ಇದಂ ನಾಮಸಹಸ್ರಂ ಯಃ ಪಠತ್ಯೇತಚ್ಛೃಣೋತಿ ಚ । ಶಿವಲಿಂಗಸಹಸ್ರಸ್ಯ ಸ ಪ್ರತಿಷ್ಠಾಫಲಂ ಲಭೇತ್ ॥ 208 ॥

ಇದಂ ಕಿರೀಟೀ ಸಂಜಪ್ಯ ಜಯೀ ಪಾಶುಪತಾಸ್ತ್ರಭಾಕ್ । ಕೃಷ್ಣಸ್ಯ ಪ್ರಾಣಭೂತಸ್ಸನ್ ಕೃಷ್ಣಂ ಸಾರಥಿಮಾಪ್ತವಾನ್ ॥ 209 ॥

ದ್ರೌಪದ್ಯಾ ದಮಯಂತ್ಯಾ ಚ ಸಾವಿತ್ರ್ಯಾ ಚ ಸುಶೀಲಯಾ । ದುರಿತಾನಿ ಜಿತಾನ್ಯೇತಜ್ಜಪಾದಾಪ್ತಂ ಚ ವಾಂಛಿತಮ್ ॥ 210 ॥

ಕಿಮಿದಂ ಬಹುನಾ ಶಂಸನ್ಮಾನವೋ ಮೋದನಿರ್ಭರಃ । ಬ್ರಹ್ಮಾನಂದಮವಾಪ್ಯಾಂತೇ ಕೃಷ್ಣಸಾಯೂಜ್ಯಮಾಪ್ನುಯಾತ್ ॥ 211 ॥